ປະທານປະເທດ ລົງຊຸກຍູ້ການພັດທະນາເສດຖະກິດຢູ່ເມືອງສັງທອງ

ສະຫາຍ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ແລະ ສະຫາຍ ສິນລະວົງ ຄຸດໄພທູນ ກໍາມະການກົມການເມືອງ ເລຂາຄະນະພັກ ເຈົ້າຄອງນະຄອນຫຼວງວຽງຈັນ ພ້ອມດ້ວຍຄະນະນໍາພັກ-ລັດ ຂັ້ນສູນກາງ ແລະ ນະຄອນຫຼວງ ໄດ້ລົງເຄື່ອນໄຫວຢ້ຽມຢາມພົບປະ ອໍານາດການປົກຄອງ ແລະ ປະຊາຊົນ ຢູ່ເມືອງສັງທອງ ນະຄອນຫຼວງວຽງຈັນ ໃນວັນທີ 13 ຕຸລາ 2017 ທີ່ເມືອງສັງທອງ ເພື່ອຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງເມືອງໃຫ້ມີການເຕີບໃຫຍ່ຂະຫຍາຍຕົວ ແລະ ສາມາດຕອບ​ສະໝອງ​ໄດ້​ຕາມ​ຄວາມຮຽກຮ້ອງ​ຕ້ອງການ​ໃນ​ໄລຍະ​ໃໝ່ຂອງ​ພັກ-ລັດຖະບານ​ວາງ​ອອກ ໃຫ້​ປະສົບ​ຜົນ​ເປັນ​ຈິງ.

      ທ່ານ ຄໍາໝູນ ຕຽງທະລາດ ເຈົ້າເມືອງສັງສອງ ​ໄດ້ລາຍ​ງານ​ກ່ຽວ​ກັບ​ການຈັດຕັ້ງ​ປະຕິ​ບັດ​ແຜນ​ພັດທະນາ​ເສດຖະກິດ-ສັງຄົມ ໃນໄລຍະຜ່ານມາ ແລະ ທິດທາງແຜນການສູ້ຊົນໃນຕໍ່ໜ້າ ໂດຍສັງເຂບ ກ່າວວ່າ: ເມືອງສັງທອງ ໄດ້ຖືເອົາວຽກງານເສດຖະກິດໃນການແກ້ໄຂຄວາມທຸກຍາກຂອງປະຊາຊົນເປັນບັນຫາສໍາຄັນ ແລະ ເປັນບຸລິມະສິດອັນດັບໜຶ່ງຂອງເມືອງ ຈຶ່ງໄດ້ກໍານົດເອົາວຽກງານກະສິກໍາເປັນທ່າແຮງ ໂດຍຕິດພັນກັບການບໍລິການທ່ອງທ່ຽວ ເພື່ອຍູ້ແຮງການພັດທະນາເສດຖະກິດສັງຄົມຕາມກົນໄກເສດຖະກິດຕະຫຼາດ ທີ່ມີການນໍາພາຂອງພັກ ແລະ ການຄຸ້ມຄອງດັດສົມຂອງລັດ ຕັ້ງໜ້າຂຸດຄົ້ນທ່າແຮງບົ່ມຊ້ອນຂອງເມືອງ ເຮັດໃຫ້ເສດຖະກິດຂອງເມືອງຂະຫຍາຍຕົວຕໍ່ເນື່ອງໃນລະດັບ 12% ຕໍ່ປີ ລວມຍອດຜະລິດຕະພັນພາຍໃນບັນລຸໄດ້ 574,08 ຕື້ກີບ ສະເລ່ຍລາຍຮັບຕໍ່ຫົວຄົນປະຕິບັດໄດ້ 16 ລ້ານກວ່າກີບ ເທົ່າກັບ 2.022 ໂດລາສະຫະລັດຕໍ່ຄົນຕໍ່ປີ ຄອບຄົວທຸກຍາກແກ້ໄຂໂດຍພື້ນຖານ.

      ໃນປີ 2017 ໄດ້ຮັບອະນຸມັດໂຄງການລົງທຶນຂອງລັດ ຈໍານວນ 38 ໂຄງການ ມູນຄ່າ 93.823,28 ລ້ານກີບ ໄດ້ຮັບອະນຸມັດ ມູນຄ່າ 6.643,06 ລ້ານກີບ ໃນນັ້ນ ໂຄງການສົ່ງເສີມວິຊາການ 10 ໂຄງການ ມູນຄ່າ 11.147,48 ລ້ານກີບ ໄດ້ຮັບອະນຸມັດ 368,79 ລ້ານກີບ ໂຄງການສໍາລະໜີ້ 13 ໂຄງການ ມູນຄ່າ 27.307,90 ລ້ານກີບ ໂຕເລກອະນຸມັດ ມູນຄ່າ 3.503,33 ລ້ານກີບ ໂຄງການກໍ່ສ້າງ 15 ໂຄງການ ມູນຄ່າ 55.367,90 ລ້ານກີບ ໂຕເລກທີ່ໄດ້ຮັບອະນຸມັດ 2.402,04 ລ້ານກີບ ໄດ້ຂຸດຄົ້ນລາຍຮັບເຂົ້າງົບປະມານ ປະຈໍາປີ 2017 ຕາມຕົວເລກແຜນການ ຈໍານວນ 6.677.868.000 ກີບ ມາຮອດປະຈຸບັນສາມາດຈັດເກັບລາຍຮັບເຂົ້າງົບປະມານໄດ້ 3.694.307.649 ກີບ ເທົ່າກັບ 65,07% ຂອງແຜນການປີ ປະຕິບັດລາຍຈ່າຍໄດ້ 20.246,04 ລ້ານກີບ ພ້ອມທັງໄດ້ສົ່ງເສີມການຜະລິດເປັນສິນຄ້າ ແລະ ປະຕິບັດຕາມແຜນນະໂຍບາຍຂອງພັກ-ລັດວາງອອກໃນການລຶລລ້າງຄວາມທຸກຍາກທີ່ລັດຖະບານຳໄດ້ກໍານົດໄວ້ໃຫ້ປະກົດຜົນເປັນຈິງແຕ່ນີ້ຮອດປີ 2020.

      ພ້ອມ​ນັ້ນ ໄດ້​ສະເໜີ​ຂໍ​ທິດ​ຊີ້ນຳ​ຕໍ່​ການ​ນຳ ເປັນຕົ້ນ​ແມ່ນ: ໃຫ້ການນໍາພັກ-ລັດ ຂັ້ນນະຄອນຫຼວງ ແລະ ສູນກາງ ສືບຕໍ່ໃກ້ສິດຕິດແທດ ແລະ ໃຫ້ທິດຊີ້ນໍາແກ່ເມືອງສັງທອງເປັນປະຈໍາ ແລະ ຕໍ່ເນື່ອງ ຂໍທຶນຮອນໃນການກໍ່ສ້າງພື້ນຖານໂຄງລ່າງ ການພັດທະນາຊັບພະຍາກອນມະນຸດໃນແຕ່ລະປີ ເພື່ອເຮັດໃຫ້ເມືອງສັງທອງມີການພັດທະນາຢ່າງຕໍ່ເນື່ອງທຽບເທົ່າກັບບັນດາເມືອງໃນ

ນະຄອນຫຼວງ ໃຫ້ພະແນກການກ່ຽວຂ້ອງນະຄອນຫຼວງ ແລະ ສູນກາງ ສະໜັບສະໜູບ ແລະ ວາງນະໂຍບາຍໃຫ້ສອດຄ່ອງກັບທິດ 3 ສ້າງ ເພື່ອເປັນບ່ອນອີງໃຫ້ເມືອງໃນການປະຕິບັດຕົວຈິງ ກ່ຽວກັບການສ້າງເມືອງໃຫ້ເຂັ້ມແຂງຮອດດ້ານ ແລະ ສະເໜີຂັ້ນເທິງສະໜັບສະໜູນ ແລະ ສ້າງເງື່ອນໄຂເພື່ອອໍານວຍຄວາມສະດວກໃຫ້ແກ່ການດຶງດູດການລົງທຶນຈາກພາຍໃນ ແລະ ຕ່າງປະເທດ ໂດຍທຶນຊ່ວຍເຫຼືອລ້າ ຫຼື ທຶນເຂົາເຈົ້າເອງ ເພື່ອຫຼຸດຜ່ອນການນໍາໃຊ້ງົບປະມານຂອງລັດ ແນໃສ່ພັດທະນາເມືອງສັງທອງ ທີ່ເປັນເຂດພື້ນຖານການປະຕິວັດໃນສະໄໝສູ້ກູ້ຊາດມີໃບໜ້າໃໝ່ ແລະ ຜົນງານຍິ່ງໃຫຍ່ກວ່າເກົ່າ.

      ຈາກນັ້ນ ສະຫາຍ ບຸນຍັງ ວໍລະຈິດ ໄດ້ໃຫ້ກຽດໂອ້ລົມ ເຊິ່ງ​ທ່ານ​ໄດ້​ຍ້ອງຍໍ​ຊົມເຊີຍ​ຕໍ່​ກັບ​ຜົນສຳເລັດ​ທີ່​ອົງການ​ປົກຄອງ​ເມືອງ ແລະ ອຳນາດ​ການ​ປົກຄອງ​ບ້ານພາຍ​ໃນເມືອງ ​ສາມາດຍາດ​ມາ​ໄດ້​ດ້ວຍຄວາມ​ຮັບຜິດຊອບ​ສູງ ສະແດງອອກ​ໃນ​ການ​ພັດທະນາ​ພື້ນຖານໂຄງ​ລ່າງ​ມີ​ເສັ້ນທາງ​ໄປ​ມາສະດວກ​ສະບາຍ ປະຊາຊົນ​ຢູ່​ດີ​ກິນດີ​ມີ​ຄວາມ​ຜາ​ສຸກ ແຕ່​ເຖິງ​ຢ່າງໃດກໍ່​ດີ ເມືອງ​ຍັງ​ມີ​ຂໍ້ຄົງຄ້າງ​ທີ່​ຈະຕ້ອງ​ເອົາໃຈໃສ່​ແກ້​ໄຂ ​ເມື່ອ​ທຽບໃສ່​ຄວາມ​ຮຽກຮ້ອງ​ຕ້ອງການທາງ​ດ້ານ​ການເມືອງ​ໃນ​ໄລຍະໃໝ່ ເປັນຕົ້ນ ແມ່ນວຽກ​ງານ ​ປກຊ-​ປກສ ປາກົດການ​ຫຍໍ້ທໍ້ຢາເສບຕິດ ໃຫ້ຊອກຫາເຫດຜົນ ພ້ອມທັງຄຸ້ມຄອງ ແລະ ແກ້ໄຂ ເພື່ອຮັບປະກັນໃຫ້ບ້ານເມືອງມີຄວາມສະຫງົບ ວຽກງານນະໂຍບາຍການເບິ່ງແຍ່ງຊີວິດການເປັນຢູ່ ຂອງພະນັກງານບໍານານ ຕ້ອງປະຕິບັດຕາມລະບຽບ ເອົາໃຈໃສ່ເປັນເຈົ້າການ ແລະ ການປະຕິບັດນະໂຍບາຍອື່ນໆ ຕ້ອງມີມາດຕະຖານ ມີລະບຽບປະຕິບັດໃຫ້ໄດ້ຕາມກໍານົດ ນະໂຍບາຍຊົນເຜົ່າ ເປັນຕົ້ນແມ່ນການຮໍ່າຮຽນ ຕ້ອງມີຄວາມສາມັກຄີ ການສ້າງພະນັກງານ ເພດໄວ ເຜົ່າຊົນ ບັນຫາສະເພາະ ໃຫ້ປະຕິບັດລະບຽບກົດໝາຍ ກໍາໃຫ້ແໜ້ນ ແກ້ໄຂໃຫ້ຖືກ ສຶກສາອົບຮົມໃຫ້ສະມາຊິກພັກ  ໃຫ້ເອົາໃຈໃສ່ຊີ້ນໍາພາອົງການຈັດຕັ້ງມະຫາຊົນ ໂດຍສະເພາະແມ່ນຊາວໜຸ່ມທົ່ວໄປ ສຶກສາອົບຮົມແຍກໃຫ້ໄດ້ບັນຫາຕ່າງໆ ໃຫ້ເອື້ອຍນ້ອງແມ່ຍິງ ປະຕິບັດຮີດຄອງປະເພນີອັນດີງາມຂອງຊາດ ພ້ອມທັງແກ້ໄຂປະກົດການຫຍໍ້ທໍ້ໃນເອື້ອຍນ້ອງແມ່ຍິງ ພ້ອມທັງປະທານປະເທດ ຮຽກຮ້ອງໃຫ້ສະມາຊິກພັກສືບຕໍ່ຮັກສາມູນເຊື້ອເມືອງວິລະຊົນ ໃຫ້ສືບທອດໄປຮຸ່ນມູຮຸ່ນ ຄຽງຄູກັບການພັດທະນາ ໃຫ້ຊຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ ມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກນະຄອນຫຼວງວຽງຈັນ (ເປັນຕົ້ນ 6 ວິໃສທັດ 6 ຍຸດທະສາດ 18 ຄາດໝາຍໃຫຍ່ 6 ໂຄງການບຸກທະລຸ 16 ໂຄງການໃຫຍ່ລະດັບຊາດ) ຢູ່ນະຄອນຫຼວງວຽງຈັນ ແລະ ມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກເມືອງສັງທອງ ໃຫ້ບັນລຸຕາມຄາດໝາຍທີ່ວາງໄວ້.

      ໂອກາດ​ນີ້ ປະທານ​ປະເທດ ພ້ອມ​ດ້ວຍ​ຄະນະ ໄດ້​ໄປ​ຢ້ຽມ​ຊົມສວນຢາງພາລາຂອງທ່ານ ດາວພອນ ພິລາວົງ ຢູ່ບ້ານສະນ໋ອດ ພ້ອມນັ້ນກໍໄດ້ໄປຢ້ຽມຢາມຟາມທະວີໂຊກ ຂອງທ່ານ ບຸນທະໜອມ ວັນນຸວົງ ຢູ່ບ້ານໜອງບົວ ເມືອງສັງທອງ ເພື່ອຊຸກຍູ້ສົ່ງເສີມ ແລະ ໃຫ້ທິດຊີ້ນໍາໃນພັດທະນາວຽກງານດັ່ງກ່າວໃຫ້ໄດ້ໝາກຜົນທີ່ດີຂຶ້ນເລື້ອຍໆ.

      ຂ່າວ ວຽງມາ ວັນທີ 14 ຕຸລາ 2017 ຮູບປະທານປະເທດລົງຢ້ຽມຢາມເມືອງສັງທອງ

2017-10-19

ຈຳນວນຜູ້ເຂົ້າຊົມ

»  1   ອອນໄລ
»  21 ມື້ນີ້
»  16 ມື້ວານນີ້
»  21ອາທິດນີ້
»  367 ເດືອນນີ້
»  4096 ປີນີ້
»  17747 ທັງໜົດ

ປະຕິທີນ

Oct-2018
S M T W T F S
1 2 3 4 5 6
7 8 9 10 11 12 13
14 15 16 17 18 19 20
21 22 23 24 25 26 27
28 29 30 31